Kultuur

Bloemhof se skoolkoor, Accelerando, se naam is afkomstig van die musiekterm vir “versnel” – en dit is presies wat ons koor regkry. Met sowat 80 lede bied Accelerando ’n ruimte vir leerders met ’n liefde vir sang en samesyn – en bewys dat die geheel groter is as die som van die individue.

Behalwe vir optredes en kompetisies is daar ’n jaarlikse kamp, sosiale geleenthede en – een van die hoogtepunte – die Kersafsluiting aan die einde van die skooljaar.

Stringendo, ons ensemble, bied aan leerders die kans om musiek te leef, nie net te speel nie. Alhoewel die orkes hoofsaaklik uit strykers bestaan, is daar ’n ruimte vir alle instrumentaliste.

Van klassieke werke tot moderne komposisies bring hulle elke noot tot lewe. Die orkes is ’n ruimte waar talent geslyp en musiek as gedeelde liefde beleef word. Stringendo neem jaarliks aan Eisteddfods deel en tree gereeld by Bloemhof-geleenthede op.

Wat in 2021 met sowat 30 lede begin het, is vandag een van die grootste kultuurgroeperings by Bloemhof met ongeveer 80 leerders wat in die oggende voor skool bymekaar kom om te oefen. Leerders het geen musikale agtergrond of kennis nodig om aan marimbas deel te neem nie – dit bied aan hulle die unieke geleentheid om musiek (en vriende!) te maak sonder om noodwendig note te kan lees.

Die Bloemhof-marimbas bestaan vandag uit verskeie groepe: konsertgroepe wat by verskeie geleenthede optree en ook beginnergroepe waar enigiemand welkom is. Ons marimbas is meer as net musiek – dis vriendskap en vrolike spanwerk.

Bloemhof se debatteerders en redenaars weet hoe om met oortuiging en respek te praat. Debat ontwikkel die vermoë om helder te redeneer, empaties te luister en logies te reageer, terwyl redenaars aan leerders die geleentheid bied om hul idees met selfvertroue te deel en taal met styl te gebruik.

Bloemhoffers neem jaarliks aan verskeie kompetisies deel, onder andere by die ATKV, en dat ons leerders hier uitblink, getuig van die sprekers én hul afrigters se toewyding om met woorde te woeker.

Toneel bied aan Bloemhoffers die kans om hulself op die verhoog uit te druk en, as deel van ’n ensemble, saam te werk, te groei en kreatief te wees.

Bloemhof bied jaarliks vir leerders die geleentheid om aan ’n produksie onder die leiding van ’n personeellid of buite-afrigter deel te neem, of om die uitdaging van ’n leerderproduksie aan te pak waar hulle self vir die hele proses verantwoordelik is. Verskeie vaardighede word ontwikkel – toneelspel, maar ook dit wat rondom die verhoog gebeur: skryfwerk, regie, en die tegniese versorging.

Behalwe vir die verhoog word Bloemhoffers ook aangemoedig om aan filmkompetisies deel te neem – en ook daar steel ons leerders soms die kollig.