Bloemhof in ’n neutedop

Waar die toekoms gebeur

Die Hoër Meisieskool Bloemhof is ’n toonaangewende Afrikaanse hoërskool vir meisies, geleë langs die Eersterivier in die boomryke Stellenbosch. Sedert ons stigting in 1875 is ons ’n plek waar tradisie en vernuwing hand aan hand loop — ’n skool waar elke leerder aangemoedig word om haar volle potensiaal te bereik, binne én buite die klaskamer. Dis hier waar die toekoms gebeur.

Die HMS Bloemhof is ’n kwintiel 5 openbare skool en is deel van die Wes-Kaap Onderwysdepartement (WKOD).
Soos ander Suid-Afrikaanse openbare skole volg ons die KBAV (beter bekend as CAPS – Curriculum Assessment Policy Statements).
Nasionale eksamens wat afgelê word, sluit die graad 9’s se sistemiese toetse en die graad 12’s se NSS (Nasionale Seniorsertifikaat) in.
Ons het ongeveer 715 leerders en ’n personeelkorps van ongeveer 70 personeellede — sowat 40 opvoeders en 30 administratiewe, terrein- en ondersteuningspersoneel.

Blomme vir die volk

Die naam “Bloemhof” was van 1875 af deel van die skool, al was dit in daardie jaar slegs die naam vir die Girls’ Public School se koshuis. Ds. Johannes Neethling het die koshuis “Bloemhof” gedoop, wat hy wou sien dat die jong dames “bloemen voor de volk” moes wees. In 1879 vra miss Gilson, ons eerste skoolhoof, vir toestemming om die skool ook “Bloemhof” te laat heet.

Lees meer oor Bloemhof se geskiedenis.

’n Skool vol potensiaal

By Bloemhof glo ons in balans. Ons leerlinge is dromers én doeners, leiers én spanmaats, fyn ingestel op akademie, maar ook tuis op die sportveld, op die verhoog of waarookal hul hulself bevind. Hier is prestasie nie die doel nie — ons moedig leerders aan om hul potensiaal te ontdek, en vier dit wanneer leerders hul beste self is.

Uitnemendheid op talle velde

Dát ons leerders presteer, is die gevolg van alles wat Bloemhof bied: waardegedrewe beginsels, uitstekende onderrig, en ’n omgewing van uitnemendheid. Die ondersteunende kultuur laat leerders en personeel tuis voel en almal kan sonder keer, maar met balans ingedagte, betrokke wees.

Meer as ’n skool

Om ’n Bloemhoffer te wees, beteken om deel van ’n ryk geskiedenis én ’n helder toekoms te wees. Dit beteken om te leer, te groei, te lag en te lei. Hier word meisies jong vroue wat met selfvertroue hul plek in die wêreld inneem.

Uitnemendheid

Die Bloemhof-benadering tot uitnemendheid

Ons is nie ’n prestasiegedrewe instansie nie, maar ’n mensgedrewe skool waar ons opreg vir mekaar omgee. Tog presteer ons leerders buitengewoon goed — omdat hulle floreer in ’n omgewing waar balans, ondersteuning en geleenthede saamwerk.

Uitnemendheid is die somtotaal van alles wat Bloemhof bied:

leerders wat van dag een af voel hulle behoort, wat mekaar met liefde ondersteun en mekaar se sukses vier
toegewyde personeel wat hul vakkennis met passie deel, altyd die ekstra myl stap, en met deernis lig werp eerder as om foute te soek
ouers wat onwrikbaar betrokke is en hul dogters aanmoedig om hul beste self te wees
moderne fasiliteite wat leer en ontwikkeling bevorder
die wete dat elkeen se beste goed genoeg is, en dat elkeen aangemoed word om hul beste self te wees

Om uitnemendheid te meet

By Bloemhof is jóú beste dié beste. “Uitnemendheid” lyk dus vir almal anders en ons meet dit aan elkeen se potensiaal. Wanneer ’n leerder sukkel om haar potensiaal te verwesenlik, tree die skool ondersteunend in. Nee, Bloemhoffers is nie perfek nie – en daaroor is ons dankbaar. Ons leerders maak foute, maar ook dit is ’n geleentheid om te leer en te groei en na uitnemendheid te streef.

Waardes

Bloemhoffers koop by die volgende vyf waardes in:

Omgee

’n Bloemhoffer is ’n mens deur ander mense.

Werksetiek

Dit is ’n voorreg om te kan werk.

Afgerondheid

Die voorkoms en optrede van ’n Bloemhoffer is altyd gepas.

Respek

Respek is die sleutel tot suksesvolle verhoudinge.

Integriteit

’n Bloemhoffer se woord is haar eer, en haar eer is haar identiteit.

Ons skoolwapen

Bloemhof se skoolwapen simboliseer waarvoor ons staan.

Die groen lowerkrans met akkers simboliseer die Eikestad, Stellenbosch, ons tuiste.

Die donkerblou band met gespe is die simbool van die band wat alle Bloemhoffers en oud-Bloemhoffers met mekaar verbind.

Die oopgeslane boek is ’n simbool van kennis; die sleutels bied die moontlikheid om kennis te ontsluit, en die drie ringe simboliseer Geloof, Hoop en Liefde.

Semper Fidelis, die skool se leuse, beteken Altyd Getrou – een van die karaktereienskappe van Bloemhoffers.

SKOOLLIED

Alma Mater, in ons harte
bly ons altyd jou getrou.
Jy leer ons in vreugd’ en smarte
Bloemhof’s naam steeds hoog te hou.

Deur die lewe as jou kinders
sal ons saam jou stempel dra.
Want jy voed ons op tot ware
burgers van Suid-Afrika.

Semper Fidelis, altyd getrou –
selfs in die vreemd en ver
sal ons met ons saam dra,
Bloemhof jou naam,
altyd en ewig trou.

Bloemhof se huidige skoollied is in 1960 deur twee leerders, Ida Scholtz (toe in matriek) en Estie Schoeman (st. 9, vandag graad 11) geskryf ter viering van die skool se verskuiwing van die rooi siersteengebou in Ryneveldstraat na die huidige gebou in Krigeville.

Die oorspronklike wysie is egter behou. Dit is in 1904 deur Miennie Hofmeyr, prof. Hofmeyr se kleindogter, gekomponeer.

Die oorspronklike skoollied was in Engels:

Band of happy-hearted maidens
gathered here for learning’s sake
And, though study takes the first place,
recreation’s in her wake.
What with Basket Ball and Tennis,
and etceteras galore.
’Tis no wonder that we’re happy
that our hearts desire no more!
Hail to thee, Bloemhof,
praises we sing,
merry our maiden band.
Oh choice of our hearts
Thy praises shall ring
all through our native land.

Nadat Bloemhof in 1921 Afrikaans geword het, is die skoollied vertaal en tot in 1960 gesing.

Blye skaar van jonge harte
hier om kennis te vergaar,
maar wat na gekwete taak ook
sport en spele kan aanvaar.
Daar is netbal, daar is tennis,
gimnastiek en wat dies meer.
So leer ons die liewe lewe
met sy lief en leed waardeer.
Heil sy u Bloemhof
ere en prys
juig dit van alle kant,
van oos en van wes
van noord en van suid
deur ons geliefde land.

Een van drie huise

Bloemhoffers word in een van drie huise ingedeel en neem jaarliks aan verskeie geleenthede deel om uiteindelik die Huisbeker te verower. Nuwe leerders word volgens hul vanne ingedeel, maar uitsonderings word gemaak vir leerders wat ma’s, oumas, tannies of niggies in die skool gehad het.

Huis Hofmeyr

Huis Hofmeyr, in blou, dra die naam van Prof. Nicolaas Jacobus Hofmeyr, een van die stigters van ons skool.

Lees meer oor prof. Hofmeyr

Huis Joubert

Huis Joubert, in rooi, dra die naam van mej. Lucie Joubert, Bloemhof se eerste Afrikaanse (en Suid-Afrikaanse!) skoolhoof.

Lees meer oor mej. Joubert

Huis Neethling

Huis Neethling, in groen, is vernoem na ds. Johannes Henoch Neethling, wat in 1874 saam met prof. Hofmeyr Bloemhof gestig het.

Lees meer oor ds. Neethling

Oorsig